នៅព្រឹកថ្ងៃពុធ ១២កើត ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី៣១ ខែឧសភា ឆ្នាំ២០២៣ ឯកឧត្តម ចាន់​ យុត្ថា​ រដ្ឋលេខាធិការ ក្រសួងធនធានទឹក​ និងឧតុនិយម​ និងក្រុមការ​ងារគម្រោង WAT4CAM បានអញ្ជើញចុះពិនិត្យការដ្ឋានជួសជុល និងស្តារឡើងវិញអនុគម្រោងអាងទឹកភាស ស្ថិតក្នុងភូមិសាស្រ្ត ស្រុកឯកភ្នំ និងស្រុកថ្មគោល ខេត្តបាត់ដំបង ។ គម្រោងខាងលើនេះបានទទួលរងនូវការខូចខាតដោយសារទឹកជំនន់កាល ពីឆ្នាំ២០២០ កន្លងទៅ ។ ដើម្បីរក្សាទឹកទុក និងស្តុកទឹកក្នុងអាងឡើងវិញសម្រាប់ការប្រើប្រាស់ ការបង្កបង្កើនផលរបស់ប្រជាពលរដ្ឋ ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានបញ្ជាឲ្យ ក្រុមការងារសហការជាមួយទីភ្នាក់ងារបារាំងសម្រាប់ការអភិវឌ្ឍ (AFD) និងដោយមានការគាំទ្រពីក្រសួងសេដ្ឋកិច្ច និងហិរញ្ញវត្ថុ ធ្វើការជួសជុលឡើងវិញជាបន្ទាន់ ។ ការងារជួសជុល និងសាងសង់ អនុវត្តសម្រេច​បានលទ្ធផលប្រមាណ ៧៥% ហើយគ្រោងនឹងបញ្ចប់ការងារសាងសង់ជាស្ថាពរនៅខែកញ្ញាខាងមុខនេះ ៕