នៅទីស្តីការក្រសួង​ នាព្រឹកថ្ងៃចន្ទ ៩កើត ខែអស្សុជ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៣ ខែតុលា ឆ្នាំ២០២៣ លោក សែម សំណាង ប្រធានអង្គភាពគ្រប់គ្រងកម្មវីធី "ការ​គ្រប់គ្រងធនធានទឹក និងការផ្លាស់ប្តូរកសិកម្មនៅកម្ពុជា ដំណាក់កាលទី១ (WAT4CAM Phase 1)"​ បានដឹកនាំកិច្ច​ប្រជុំ​បូក​សរុប​លទ្ធផលអំពីបេសកកម្មបទប្បញ្ញត្តិនៃការបែងចែកទឹក (Wrap-up Meeting on Water Sharing Regulation Mission) ដោយមានការចូលរួមពីលោក លោកស្រី ដែលជា​តំណាង​ ​នាយកដ្ឋានគ្រប់គ្រង​ និងអភិរក្សធន​ធាន​ទឹក នាយកដ្ឋានធារាសាស្រ្តកសិកម្ម​ នាយកដ្ឋាន​សហគមន៍​​​កសិករប្រើ​ប្រាស់​ទឹក និង​នាយកដ្ឋាន​ទឹកស្អាត និងអនាម័យ រួមទាំងទីប្រឹក្សា​បច្ចេកទេស​ទទួលបន្ទុក​ផ្នែក ISWM & IWRM។

លោកប្រធានអង្គប្រជុំបានឱ្យដឹងថា​ កិច្ចប្រជុំពិភាក្សាផ្តោតសំខាន់ទៅលើការគ្រប់គ្រង​ ការបែងចែក​ទឹក​ប្រកបដោយសមធម៌ និង​​វិធីសាស្រ្ត​នានា​សម្រាប់គម្រោងប្រព័ន្ធធារាសាស្រ្តខ្នាតធំ​ ជាពិសេសទាក់ទងនឹង​ការចែករំលែកទឹក​ក្នុង​ចំណោម​អ្នកប្រើ​ប្រាស់នៅប្រព័ន្ធធារាសាស្រ្តកង្ហត​ ក្នុងខេត្តបាត់ដំបង និងប្រព័ន្ធ​ធារា​សាស្រ្ត​​ម្កាក់​ ក្នុងខេត្ត​សៀមរាប។

សូមជម្រាបថា​​ ការគ្រប់គ្រងអាងស្តុកទឹកមានអត្ថប្រយោជន៍ដូចខាងក្រោម៖

- អាងស្តុកទឹកជាទំនប់ពហុបំណង​ ដែលដោះស្រាយក្នុងការបែងចែកទឹក ហើយមានភាព​ស្មុគស្មាញ​បន្ថែម​ទៀតនៅក្នុងលក្ខខណ្ឌនៃការគ្រប់គ្រង។

- ការពង្រីកសមត្ថភាពមន្រ្តីមូលដ្ឋាន សមាជិកសហគមន៍កសិករប្រើប្រាស់ទឹក និងផ្សព្វផ្សាយឱ្យមាន​ការ​ចូល​រួមពីអ្នកពាក់ព័ន្ធដែលទទួលផល និងកសិករផងដែរ។

- អាងស្តុកទឹកមានមុខងារអាស្រ័យលើ ទី១)សមត្ថភាពស្តុកទឹកមួយចំនួនដែលប្រមូលបានក្នុងរដូវវស្សា​ ទី២)​ប្រសិទ្ធភាពនិងសមត្ថភាពក្នុងការដំណើរការនិងភាពជឿជាក់នៃហេដ្ឋារចនាសម្ព័ន្ធរក្សាទឹកទុក​ ទី៣)​​​ នីតិវិធី​ និងការអនុវត្តក្នុងការគ្រប់គ្រងទឹកដែលរក្សាទុកតាមមុខងារ។

- វិធីសាស្រ្តគ្រប់គ្រង និងកាវាយតម្លៃ

- អត្ថប្រយោជន៍

កិច្ចប្រជុំបូកសរុបលទ្ធផលការងារ​បាន​បញ្ចប់​ដោយជោគជ័យ​ និងទទួលបានលទ្ធផលផ្លែផ្កាល្អប្រសើរ​៕