នៅទីស្តីការក្រសួង នាព្រឹកថ្ងៃពុធ ១០រោច ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៨ ខែវិច្ឆិកា ឆ្នាំ២០២៣ ឯកឧត្តម ចាន់ យុត្ថា រដ្ឋលេខាធិការ និងជានាយកកម្មវិធី WAT4CAM នៃក្រសួង​ធនធានទឹក និងឧតុនិយម បានអនុញ្ញាតឱ្យ​លោកស្រី Sandrine Boucher នាយិកា AFD ប្រចាំកម្ពុជា និងសហការី ចូលជួបពិភាក្សាការងារ​លើកម្មវិធីការគ្រប់គ្រងធនធានទឹក និងការផ្លាស់ប្តូរកសិកម្ម​នៅ​ប្រទេសកម្ពុជា ជំហានទី១ (WAT4CAM)។

ក្នុងឱកាសនោះ​​ ភាគីទាំងពីរបានពិភាក្សាលើចំណុចសំខាន់ៗដូចខាងក្រោម៖

១. គោលការណ៍ត្រួតពិនិត្យ គ្រប់គ្រង និងកិច្ចសហប្រតិបត្តិការរវាង PMU, TAs, AFD និង EU ដើម្បី​ឈាន​ទៅរកការអនុវត្តទទួលបានជោគជ័យតាមផែនការ​។

២. ពង្រឹងនីតិវិធីនៃកិច្ចដំណើរការស្តីពីការសិក្សាគ្រោងប្លង់ ការរៀបចំឯកសារដេញថ្លៃ និងការអនុវត្ត​ត្រួត​ពិនិត្យ​ការសាងសង់។

៣. ចែករំលែកព័ត៌មានស្តីពីការដោះស្រាយផលប៉ះពាល។

៤. ទាក់នឹងការងារការសិក្សាព្រែក PDA06 និង PDA08 ថាតើមានផលប៉ះពាល់ដល់ផែន​ការ​កសាង​ព្រែក​ជីកហ្វូណនតេជោ ដែរឬទេ។

៥. វឌ្ឍនភាពនៃការរៀបចំប្រព័ន្ធព័ត៌មានវិទ្យាស្តីពីការគ្រប់គ្រងប្រព័ន្ធធារាសាស្ត្រ(CISIS)។

៦. វឌ្ឍនភាពនៃការរៀបចំប្រព័ន្ធព័ត៌មានអាកាសធាតុ និងការព្យាករណ៍អាកាសធាតុ (WCIS)។

៧. វឌ្ឍនភាពនៃការរៀបចំនីតិវិធី និងគោលការណ៍ណែនាំការគ្រប់គ្រងធនធានទឹកចម្រុះ (IWRM)។

ជំនួបពិភាក្សាបានបញ្ចប់ក្រោមបរិយាកាសរីករាយ និងស្និទ្ធស្នាល ហើយភាគីទាំងពីរ​បានបង្ហាញ​នូវ​សុច្ឆន្ទៈ​​​បន្តពង្រឹងកិច្ចសហប្រតិបត្តិការរួមគ្នាសម្រាប់កម្មវិធីការគ្រប់គ្រងធនធានទឹក និងការផ្លាស់ប្តូរ​កសិកម្ម​​នៅ​ប្រទេសកម្ពុជាជំហានទី១ (WAT4CAM) និងគម្រោងផ្សេងទៀតក្រោមហិរញ្ញប្បទានពី​ទីភ្នាក់ងារបារំាង​សម្រាប់​ការអភិវឌ្ឍ (AFD)៕